ROXAS CITY– Nag-apelar sang bulig gikan sa gobyerno ang pamilya sang Capizeña overseas Filipino worker (OFW) nga ginaalegar ginapagutuman sang iya employer sa Kuwait.
Sa interview sang Bombo Radyo kay Leonila Besar sang Barangay Agambulong, Jamindan, Capiz, iloy sang OFW nga si Yolanda Villasis, ginpahayag sini nga nagpangayo sa ila sang bulig ang anak bangud wala indi na sini masarangan ang pagpagutom sa iya sang employer.
Ginpahayag sang ginang nga nagasugid ang iya nga anak nga tubig na lamang ang ginahatag sa iya kag sa mga kaupdanan nga OFW sang ila nga employer kag masobra na sa isa ka semana nga wala sila ginapakain rason nga amat amat sila nga nagapangluya.
Suno pa sa iloy nga indi man makasulod sa kusina sang balay ang anak agud magkuha kuntani sang pagkain bangud ginakandado ini sang iya nga amo .
Bangud diri, nagplano ang anak sini nga magpalagyo sa balay sang iya amo, apang nabalaka nga pasakaan ini sang kaso.
Nahibaluan nga masobra pa lamang sa duha ka bulan nga nagatrabaho sa Kuwait bilang domestic helper si Villasis.
Matandaan nga nagviral pa sa social media site nga Facebook ang video sang OFW nga nagapangayo ini sang bulig nga makapauli sa Pilipinas bangud wala sini masarangan ang pagpagutom sa iya sang amo sa Kuwait.
