ROXAS CITY – Nag-apelar karon sang bulig ang pamilya sang isa ka Capizeña nga overseas Filipino worker (OFW) sa Kuwait matapos mabutang sa alang alang ang kabuhi sang ila himata bangud sa pagmaltrato sa iya sang iloy sang employer.
Sa exclusive interview sang Bombo Radyo Roxas kay Hilda Delojo, utod sang OFW nga si Jeny Delojo Hingras, ginpahayag sini nga tuman ang ila nga pagkabalaka sa kahimtangan sang utod matapos nahibaluan nga ginapintasan sang iloy sang iya employer.
Sa walo ka bulan nga pagtrabaho sa nasambit nga nasyon, duha ka beses na ini nga nagpalagyo kag nagpangayo sang bulig sa iya agency sa Kuwait.
Sa tagsa ka magbiya ang iya nga employer kag mabilin ini kaupod ang ginabantayan nga bata kag ang ginareklamo nga tigulang, diri nagakahinabo ang pagsakit sa iya.
Sa pagpalagyo sa ng Capizeña nadakpan ini sang utod sang iya nga employer sa diin gintampa ini kag ginbalik sa agency.
Sa karon yara sa agency ang nasambit nga OFW kag nagpakitluoy nga pabalikon na lamang sa Pilipinas, apang ginhambalan nga pahanugutan lamang nga makapauli sa pungsod kun magpakastigo ini.
