ROXAS CITY – Tuman nga kasubo ang nabatyagan sang pamilya Colmo matapos nga nabalitaan nga ginaalegar nagpanginmatay ang ila himata nga nagatrabaho bilang Pinay domestic helper sa Sabah-Al-Nasser, Kuwait.
Ginkilala ang biktima nga si Angela Colmo 51-anyos kag tumandok sang Barangay Poblacion, Pres. Roxas, Capiz.
Ginaalegar nga ginlaslas sini ang iya pulso kag naglumpat sa rooftop sang balay kun sa diin ini nagatrabaho.
Sa exclusive interview sang Bombo Radyo sa gumangkon sang biktima nga si Mark Anthony Colmo nga nakibot na lamang sila sang may nagpalab-ot sang impormasyon nga nagpanginmatay ang biktima nga si Angela Colmo matapos nga nagpositibo ini sa Coronavirus Disease ukon COVID-19.
Suno kay Mark nga indi sila makapati nga nahimo ini sang iya nga tiya bangud sa ila nga pagkilala mabuot, mapinalanggaon kag maalwan klase nga himata ang nasambit nga biktima.
Ginpahayag pa sini nga antes natabo ang insidente nagtawag pa ang biktima sa iya pamilya kun sa diin kasubong nga nagapamilin-bilin na ini sa iya iloy.
Nagapati naman ang pamilya sang biktima nga wala sang foul play ang kamatayon sang ila himata bangud kaugalingon mismo nga hand written ni Angela ang nasulat sa iya nga suicide note kun sa diin luyag sini nga i-cremate ang bangkay sa tion nga dal-on na sa Pilipinas.
Apang, posible nga wala sini masarangan ang nabatyagan nga depression kasunod sang pagpositibo sini sa amo nga virus nga malayo sa iya pamilya.
Mahibaluan nga kapin sa anom katuig naman ini nga nagatrabaho sa iya employer bilang domestic helper.
Sa karon, nagapakig-angut na ang pamilya Colmo sa ahensya sang Department of Foreign Affairs ukon DFA agud mabuligan sila nga mapauli ang bangkay sang biktima sa Pilipinas.
Samtang, nagapadayon naman ang imbestigasyon sang mga otoridad sa Kuwait angut sa kamatayon sang amo nga biktima.
