ROXAS CITY – Nagapati ang utod sang Pinay Domestic Helper nga may yara sang foul play ang kamatayon sang iya utod nga ginaalegar nagpakamatay sa Sabah-Al-Nasser sa Kuwait.
Base sa nakuha nga impormasyon sang Bombo Radyo Roxas kay Victoria Colmo utod sang wala na ginhingadlan nga biktima nga indi penmanship sang utod ang nakasulat sa “suicide note” nga ginbilin sini antes ini napatay.
Suno kay Colmo apisar nga high school graduate lamang ang iya utod imposible nga wala ini nakahibalo sang spelling sang mga simple nga tinaga kapareho sang “thankyou kag friends” nga amo nakasulat sa iya nga suicide note.
Magluwas diri, indi man kasubong sini mag spell-out ang iya utod kun mag chat sila nga duha gani nagapati ini nga posible arabo ang nagsulat sang amo nga suicide note.
Dugang pa sini nga antes pa nakita nga nakasab-it ang bangkay sang biktima sa pader nakita pa sang upod ni Lenny sa trabaho nga isa man ka pinoy ang suicide note kun sa diin mahamuok pa ang tulog sini.
Apang, nakibot na lamang sila sang ulihi nga yara na ang biktima sa pader kun sa diin wala na sang kabuhi.
Ginpahayag pa ni Colmo nga may yara sang kaupod sa trabaho ang iya utod nga isa ka Ethiopian nga masami nasuya sa biktima.
Nahibaluan nga wala na sila naka-istorya sang biktima gani daku ang pagpati sini nga posible may natabo nga malain sa iya utod antes ini napatay.
Ginpahayag sini nga antes pa natabo ang insidente apat ka-adlaw na ang nakaligad nga nag-istorya pa sila sang biktima kun sa diin ginpakigbahin sini nga may yara na ini sang malain nga ginabatyag.
Daku sa gihapon ang pagpati sang utod sang biktima nga indi penmanship sang utod ang nakasulat sa suicide note kag duda ini nga posible ginhungod patay ang biktima sang wala matumod nga suspek.
Magluwas diri, nagapati man ang mga kaupod sini nga mga Overseas Filipino Workers (OFW’s) nga ginpatay ang biktima kag ginpaguwa nga nag-suicide ini.
Samtang, nagpakig-angut naman ang pamilya Colmo sa Department of Foreign Affairs (DFA) angut sa pagbalik sang bangkay sang biktima sa Pilipinas kun sa diin pag-abot diri gilayon ini nga ipaidalom sa autopsy examination antes i-cremate kag dal-on sa probinsya sang Capiz.
