UPDATE!
DUMALAG CAPIZ – Nagapabilin nga misteryo ang pagkadula sang isa ka seaman nga ginaalegar nalumos sa bahin sang kasubuan sang Barangay Dolores sa banwa sang Dumalag.
Matandaan nga ang seaman ang ginkilala kay Marnel Bulahan residente sang nasambit nga lugar kag tumandok sang banwa sang Pontevedra.
Sa interview sang Bombo Radyo kay Police Major Leomindo Tayupon, hepe sang Dumalag MPS nga sa pagpakig-angot nila sa pamilya Bulahan, nga maga-hired ang mga ini sang Psychic sa bahin sa Manila agud makabulig sa pagtumod kun diin ang ila himata.
Kun matandaan nga sang tinalikdan nga Oktubre tuig 2020, ginaalegar nga nalumos ini sa nasambit nga suba apang wala sang may nakakita kun nalumos gid man bala ini.
Ginklaro man diri ni Tayupon nga wala sang kamatuoran ang mga nagalapta nga istorya nga nagalagaw sa internet nga nakit-an ang bangkay sang biktima sa isa ka septic tank, bangud suno diri, ila ginpangbuksan ang mga septic tanks sa lugar kag negatibo ang bangkay sang biktima.
Sa karon, padayon nga nagapakig-angot ang mga kapulisan sa pamilya Bulahan sa mangin imbestigasyon sa misteryoso nga pagkadula sang nasambit nga biktima.
