ROXAS CITY – Tuman ang pagpasalamat sang pamilya sang 82-anyos nga lola sa duha ka mag-abyan nga nagrescue sa ila nga himata sa nasunog nga balay.
Personal nga ginpasalamatan sang mga anak ni ROgelia Surigao sang Barangay Culasi, Roxas ang barangay tanod nga si Kenth Denoman kag abyan nga si Angelo Barlas, bangud sa ila kaisog para lamang maluwas ang nasambit nga lola.
Suno kay Kenth Denoman wala siya nagpangduha duha nga sudlon ang nagadaba daba nga balay bangud sa hinyo sang isa ka anak ni Lola Rogelia .
Nahibaluan nga ginbasa ni Denoman ang habol antes magsulod sa balay bilang proteksyon sa iya nga kaugalingon.
Matapos ginsakwat paguwa sa balay ang tigulang, wala ginalauman nga matalsikan sang nasunog nga wiring sang kuryente ang abaga kag ulo ni denoman.
Bangud nakabatyag sang hapdi si Denoman, ginhinyo sini ang abyan nga si Angelo nga amo ang magdala kay Lola Rogelia sa nagresponde nga ambulansiya.
