ROXAS CITY – Desidido na nga magpasaka sang kaso ang pamilya sang senior citizen nga si Medelina Arevalo Porcal, 64-anyos batuk sa mga suspek nga lunsay menor de edad nga nagpaulan sang bala sa iya balay sa Sitio RMB, Barangay Agsirab Dumarao Capiz, takna alas 9:00 sang gab-i sang Agosto 20.
Sa interview sang Bombo Radyo kay Police Staff Sergeant Raffy Arcenas, imbestigador sang Dumarao PNP, posible attempted murder ang pangatubangon sang mga suspetsado kag ginahulat na lang matapos ang pagtuon sang DSWD.
Matandaan isahanon kag matulog na kuntani si Porcal sang nakabati ini sang lupok sa guwa kag sa iya pagtsekyar sa bintana, nakit-an niya ang duwa ka menor de edad nga nagalakat-lakat sa nalikod nga bahin sang iya puluy-an kag didto ginpaulanan sang bala ang iya balay kag ginhabuyan pa sang granada.
Ginalantaw naman sang kapulisan nga daan nga hiligut-anon ang motibo sang mga suspek kag ginapahayag natabo na ang kapareho nga insidente sa isa pa ka balay sang biktima sa barangay Poblacion sa nasambit nga banwa.
Apang ginparekord lamang ini sa barangay kag wala na ginpadako ang isyu.
Sa karon, padayon pa nga ginalalip ang mga suspek kag ang imbestigasyon sang Dumarao PNP angut sa insidente.
