ROXAS CITY – Ginhimo sang mga nurses kag doktor ang tanan nila nga ikasarang agud mahatagan sang nagakaigo nga pagtatap ang duha ka lapsag sa triplet sang isa ka ginang nga nagbun-ag sa Bailan District Hospital.
Ini ang ginpahayag sang Chief of Hospital nga si Dr. Ma. Cellini Bauson sang mainterview sang Bombo Radyo.
Suno kay Bauson, Abril 28 sini nga tuig sang ulihi nga nagpacheck-up si Edilyn Giluane, 19 anyos kag didto ginpanugyanan ini nga magpa-ultrasound apang Abril 30 sang ginpangayuan ini sang resulta sang ultrasound sa iya nga follow-up check-up, napaslawan si Giluane nga matuman ang ginpanugyan sang doktor.
Mayo 12 sang ginsakitan na sang tiyan si Giluane kag bangud wala sini natuman ang panugyan sang doktor nga magpa-ultrasound, ginpakamaayo sang ospital nga ipaidalom ini sa pelvic x-ray kag didto pa lamang natukiban nga triplets gali ang iya ginabusong.
Sang gintsekyar sang doktor, ginapahayag nga indi sang husto ang plastar sang lapsag sa tiyan ni Giluane rason nga ginpaidalom ini sa caesarian operation.
Nangin madinalag-on man ang operasyon apang sa ulihi natukiban nga pre-mature ang tatlo ka mga lapsag.
Suno kay Bauson nga bangud pre-mature ang mga lapsag, didto kag gin-refer sang ospital ang pasyente sa Roxas Memorial Provincial Hospital bangud bilang Level 1 hospital lamang ang Bailan District Hospital, wala sila sang nagakaigo nga pasilidad para diri.
Apang isa lamang ka incubator ang bakante sa RMPH rason nga isa lamang ka lapsag ni Giluane ang nadala sa amo nga ospital.
Didto kag ginpalab-ot sa pamilya sang pasyente nga isa lamang ka lapsag ang ma-akomodar sang RMPH kag mismo ang pamilya man ang nag-desisyon nga ipabilin na lamang sa amo nga ospital ang duha pa ka mga lapsag.
Bangud diri, wala sang nahimo ang pamunuan sang ospital kundi himuon ang tanan nga opsyon para lamang masalbar kag matatap sang husto ang duha ka mga lapsag.
Suno pa kay Bauson nga mismo si Mr. Reyland Bataican, amay sang mga lapsag ang nagpirma pa sang letter nga nagasaad sang Do Not Resuscitate (DNR).
Bangud ginpili sang pamilya nga ipabilin sa ospital ang duha ka lapsag kag nahangpan sang mga nurses kag doktor nga yara sa ‘serious condition’ ang mga ini, apisar kulang sa pasilidad, naghimo sila sang pila ka mga opsyon.
Sang tion nga gin-ambu bag na ang duha ka mga lapsag suno kay Bauson, ginhambalan man ang pamilya nga amat-amat na nga nagaluya ang mga ini kag didto dalayon naman nga ginbawian sang kabuhi.
Ginklaro man ni Bauson nga ang pagtugyan sang nurses kay Bataican kag sa iya hinablos sang pag-ambu bag sa duha ka mga lapsag ang may superbisyon man mismo sang pamilya sang pasyente.
Panindugan ni Bauson, wala sila sang kakulangan sa pagtatap sa pasyente bangud ginhimo nila ang tanan para lamang masalbar ang duha ka lapsag.
Kuntani suno kay Bauson ginsunod lamang ni Giluane ang panugyan sang doktor sang ini ang nagabusong pa lamang, mas napreparahan pa ang iya nga pagbun-ag.
