ROXAS CITY – Nagpanindugan ang pamunuan sang Bailan District Hospital nga wala ini sang dapat nga sabton natuhoy sa ginpalab-ot nga reklamo sang isa ka ginang sa Bombo Radyo natuhoy sa sala nga findings sang doktor sa iya naaksidente nga anak kag mahal nga pagsuluktan sa paggamit nila sang ambulansiya.
Ini ang nakuha nga impormasyon sang Bombo Radyo sang nalab-ot ang Chief of Hospital nga si Dr. Venus Loretizo.
Ginapanindugan sini nga wala sang may nahimo nga kalainan ang mga staff sang nasambit nga ospital bangud nahibaluan sang mga ini ang ila nga trabaho.
Indi man suno diri dapat nga sabton ang reklamo nga ginpalab-ot sang ginang sa Bombo Radyo bangud wala ini sang basehan kag wala sila sang may nabaton nga pormal nga reklamo.
Mas maayo suno diri nga kun may reklamo ang isa ka pasyente ukon pamilya sini, idiretso ini sa talatapan sang ospital agud gilayon nga masabat ang ila mga palamangkutanon.
Matandaan nga nagdangop sa Bombo Radyo ang isa ka iloy agud ireklamo ang tuman ka mahal nga pagpanukot para sa ambulansiya kag sala nga findings sang doktor sang nasambit nga ospital sa iya naaksidente nga anak.
Suno kay Nanay Inday, naaksidente sa motorsiklo ang iya anak sadtong Disyembre 24, 2019 kun sa diin nasamaran ang ulo sini rason nga gindala nila sa amo nga ospital.
Suno diri nga gin-refer sila sa Western Visayas Medical Center sa Iloilo bangud suno sa doktor na-fracture ang ulo sang iya anak apang pag-abot diri nagguha sa findings sang doktor nga napak-ad lamang ang panit sang ulo sang iya bata.
Magluwas diri nagalain man ang buot sang ginang bangud ginsukot sila sang P5, 000 agud maggamit ang ambulansiya sang ospital kun sa diin ang P1, 500 diri ang ginhatag sa nurse nga magaupod samtang ang P3, 500 ang gingamit naman para sa krudo sa ambulansiya.
