Roxas City – Wala naga-untat ang pamunuan sang gobyerno sa banwa sang Pilar sa ila kampanya batuk sa iligal nga pagpangisda sa kalalawran.
Ini ang ginpahayag ni Mayor Arnold Perez sang mainterview sang Bombo Radyo.
Tinutuyo sini suno sa alkalde nga matapna ang iligal nga aktibidades sang mga mangingisda pinaagi sa paggamit sang dinamita kag mga active fishing gears kaangay sang trawl kag iban pa.
Ginpahayag ni Perez nga aktibo kag wala man nagakulang sa pagpatrolya ang mga bag-o nga grupo sang Bantay Dagat Task Force kag Philippine Coast Guards agud masiguro kag mabantayan ang kadagatan sang nasambit nga banwa.
Nahibaluan nga naglab-ot na sa 200 mil pesos ang nakolekta nga fines sang banwa sa mga mangingisda nga wala nagasunod sa nagakaigo nga pagsulundan.
Sa pihak sini nagapasalamat naman ang alkalde sang banwa sa mga pumuluyo kag mga opisyal sang gobyerno nga nagaupod sa ila kampanya batuk sa iligal nga pagpangisda nga katuyuan nga maamligan ang marine resources sang probinsya.
