ROXAS CITY – May mga ginadihon na nga tikang ang konseho sang Barangay Bolo, sining siyudad agud mapabilin ang katinlo sa ila lugar kag makalikaw sa balatian nga dengue.
Ini ang ginpahayag ni Punong barangay Siolly Andrade sang mainterview sang Bombo Radyo Roxas.
Suno kay Andrade nga nagapatigayon sila sang information dissemination sa ila lugar kag naga-inisyar man ini sa pagpaninlo sa palibot nga mga ginahabuyan sang basura sang mga pumuluyo.
Magluwas diri suno sa iya, ila man ginatsekyar ang mga kanal sa pila ka mga porsyon sang barangay, kag ginapatinluan ini kun madamo sang basura agud indi magbara.
Indi man madula ang pagpahanumdom sang mga empleyado sang mga barangay officials kag mga BHW’s nga nagabalay-balay agud ma-edukar ang mga pumuluyo sa pagtinlo sa ila palibot.
Aminado man ini nga nagapatigayon man sila sa mga eskwelahan sang kampanya batuk sa nasambit nga balatian.
Mahibaluan nga ang Barangay Bolo ang nagapanguna nga barangay sa siyudad sang Roxas nga may pinakamadamo nga kaso sang dengue kun sa diin naglab-ot na sa 32 ka mga indibidwal ang nagpositibo humalin sang Enero tubtob Hunyo sini nga tuig.
