Mas pabaskugon sang pamunuan sang Capiz National High School (CNHS) ang pila ka mga security measures kasunod sang nagluntad nga shooting incident sa Tacloban City agud masiguro ang kaluwasan sang mga estudyante, manunudlo kag iban pa nga personnel sang buluthuan.
Sa interview sang Bombo Radyo kay Charle Begas, Principal IV sang Capiz National High School, iya ginpahayag nga kabahin sang ila ginapadayon nga mga tikang amo ang pagpabaskog sang monitoring sa sulod kag guwa sang campus,pagdugang sang mga CCTV cameras, kag pagpalig-on sang mga polisa sa pagsulod kag pagguwa sang mga tawo sa eskwelahan.
Suno kay Begas, may plano man ang talatapan nga magbutang sang dugang nga metal scanners sa mga entry points sang eskwelahan agud mapahamtang ang mas hugot nga inspeksyon kag malikawan ang pagpasulod sang mga ginabawal nga bagay.
Pahayag pa niya, padayon man ang koordinasyon sang eskwelahan sa kapulisan kag sa lokal nga panguluhan agud mapabilin ang seguridad sa palibot sang campus kag malikawan ang ano man nga insidente nga mahimo magbutang sa peligro sa mga estudyante.
Nagpanawagan man ang natungdan sang kooperasyon sang tanan nga estudyante, ginikanan kag stakeholders sa pagpatuman sang mga safety protocols agud mapadayon ang malinong kag luwasnga palibot sang nasambit nga eskwelahan.
