ROXAS CITY – Gin-eksplikar sang pamunuan sang Hospital Management Unit (HMU) ang pagsulundan sa pagpanukot sang mga ambulance kag nurse sa tion nga may yara sang gina-refer nga pasyente sa iban nga mga ospitals.
Kasunod ini sang nabaton nga reklamo sang Bailan District Hospital gikan sa isa ka ginang matapos nagdangop sa Bombo Radyo natuhoy sa sala nga findings sang doktor sa iya naaksidente nga anak kag mahal nga pagpanukot sa paggamit sang ambulansiya.
Sa interview sang Bombo Radyo Roxas kay Roxas Memorial Provincial Hospital (RMPH) chief-of-hospital Dr. Alex Nolasco nga sandig sa Revise Revenue Code of Capiz, Ordinance No. 001 series of 2017 nga ang paggamit sang ambulansya ang may yara sang balayaran sa kada 10 kilometers kalakip na diri ang isa ka litro sang krudo.
Samtang, P1,500 naman ang ginabayad sa mga nurses ukon doctors nga naga-upod sa pagdul-ong sang pasyente sa iban nga ospital bangud indi man mahimu nga makaupod ang iban nga mga nurses sa ospital bangud posible nga maapektuhan man ang ila duty.
Apang sandig sa nasambit nga ordinansa sa tion nga may yara sang emergency cases ang pasyente mahimu naman nga magbayad ang pamilya sini sa tion nga nadul-ong na ang pasyente sa pagasaylohan sini nga ospital.
Ginpasalig ni Nolasco nga magapatigayon ini sang imbestigasyon natuhoy sa reklamo sang nasambit nga ginang.
Samtang desidido naman ang tagreklamo nga magsumiter sang written complaint sa opisina ni Nolasco agud mahatagan sang nagakaigo nga sabat ang iya alegasyon.
Matandaan nga nagdangop sa Bombo Radyo ang isa ka iloy agud ireklamo ang tuman ka mahal nga pagpanukot para sa ambulansiya kag sala nga findings sang doktor sang nasambit nga ospital.
Nahibaluan nga naaksidente sa motorsiklo ang iya anak sadtong Disyembre 24, 2019 kun sa diin napilasan ang ulo sini rason nga gindala gilayon sa nasmabit nga ospital.
Ginpahayag sini nga gin-refer ini sa Western Visayas Medical Center sa siyudad sang Iloilo bangud suno sa doktor na-fracture ang ulo sang iya ana
Apang, nakibot na lamang ang ginang sang nagguha ang findings sang doktor sa diin napak-ad lamang ang panit sang ulo sang iya bata.
Bangud diri nagalain naman ang buot sang ginang matapos nga nagbayad ini sang P1,500 kag ginhatag sa nurse nga magaupod sa pasyente samtang ang P3, 500 naman ang gingamit para sa ambulansiya.
