ROXAS CITY – Gin-athag sang pamunuan sang isa ka BPO Company nga wala naghalin sa ila talatapan ang virus nga gintunaan sang pagpositibo sa COVID-19 sang 5 sini ka mga empleyado.
Sa interview sang Bombo Radyo kay Mr. Neil Iosif Ilagan, Provincial Recruitment Manager sang nasambit nga BPO Company ginpahayag sini nga hugot nga ginapatuman ang minimum health protocol sa mga empleyado nga nagasulod sa ila nga talatapan.
Gin-athag sini nga wala sang local transmission sa ila nga opisina bangud sa nagkalain-lain nga mga shifts nga naga-duty ang mga nagpositibo sa amo nga balatian.
Suno kay Ilagan nga dako ang posibilidad nga sa guwa sang talatapan nakuha sang mga empleyado ang virus.
Magluwas diri, halos adlaw-adlaw nga gina-disinfect ang nasambit nga talatapan.
Gin-athag man sini nga wala na nakaduty pa ang mga nagpositibo nga mga empleyado bangud sang tion nga nakitaan sila sang sintomas, wala na ini sila ginapasulod sa talatapan.
Samtang ginpanginwala sini nga gintago sang kompanya ang mga nagpositibo nga mga empleyado.
Suno kay Ilagan nga wala na gina-anunsyo pa sa mga empleyado ang mga nagpositibo nila nga mga kaupdanan para sa proteksyon kag pribado nga kinamatarong man sang mga empleyado.
Apang gilayon nga ginmanduan kag ginhatagan sang abiso sang kompanya ang mga na close-contact sang mga nagpositibo.
Mahibaluan nga naglab-ut na sa 5 ka mga empleyado ang nagpositibo sa COVID-19 sa nasambit nga BPO Company.
