ROXAS CITY – Nagpasalig ang pamunuan sang Mambusao District Hospital nga magapatigayon sila sang imbestigasyon natuhoy sa natabo sa isa ka pasyente nga gindala sa amo nga ospital nga wala ginhatagan sang bulong sa rabbies sa nasambit nga ospital.
Ini ang ginpahayag sang ni Dr. Florencio Luching chief of hospital sang Mambusao District Hospital sang mainterview sang Bombo Radyo.
Suno kay Dr. Luching nga indi pa sini matumod subong ang mga nurses kag doctor nga amo ang duty sa nasambit nga ospital sang nagkadto ang nasambit nga pasyente.
Ginpahayag pa sang amo nga doktor nga posible isa lang ang doktor nga duty sa amo nga ospital rason nga indi sini matatapan ang tanan nga mga pasyente.
Posible nga wala matsekyar sang doktor ang kondisyon sang amo nga pasyente.
Gin-athag man ni Dr. Luching nga indi prescribe ang mga nurses sang bulong nga nagakadapat sa amo nga pasyente kun wala sang doktor.
Matandaan nga nagpabutyag sa Bombo Radyo ang anak sang amo nga pasyente matapos nga ginpamalibaran nga hatagan sang bulong sa amo nga ospital matapos nga ginkagat sang kuring ang iya amay sa Barangay Agloway, Jamindan, Capiz.
Sa ekslusibo nga interview sang Bombo Radyo kay Alyas Nene nga gindala nila ang iya amay sa Mambusao District Hospital matapos nga nakabatyag ini sang hilanat, pagpalangurog kag kabudlay sa pagginhawa.
Ginpahayag sini nga luyag lamang kuntani nila nga magpangayo sang bulong sa rabies para sa pilas sang iya amay matapos nga ginkagat sang kuring.
Apang, ginkakibot ni alyas Nene sang gin-abisohan sila sang isa ka staff sa emergency room nga magpauli kag magbalik sa masunod nga adlaw para sa injection.
Ini bangud wala sang makuha sang bulong sa Outpatient- Department sa nasambit nga ospital.
