ROXAS CITY – Padayon nga nagahulat tubtob subong ang pamunuan sang Public Order Security Unit (POSU) sang banwa sang Sigma sa mangin sabat ni Sangguniang Bayan member Fernando Capapas may kaangtanan sa wala pagsunod sini sa ordinansa nga ginapatuman sang ila banwa partikular ang illegal parking.
Sa interview sang Bombo Radyo kay Mr. Constantine Y. Basas, assistant sang Order Security Unit (POSU) sa amu nga banwa ginsiling sini nga ginaproseso na sang ila talatapan ang amu nga isyu kag napalab-ot naman sa kapulisan agud mapa-blotter.
Suno kay Basas, gin-imbitahan na nila si SB member Capapas nga magpadulong sa ila opisina agud hinalaan ang amu nga isyu kag gilayon nga mahatagan sang solusyon, apang tubtob subong wala sa gihapon ini nagapakig-angut sa ila.
Matandaan nga sang damlag lang, naglupok ang isyu kung sa diin ginapahayag ginsita sang POSU officer si Capapas bangud sa pagparking sini sang iya salakyan sa lugar nga indi dapat pagaparkingan sa dis oras sang gab-i.
Ginapahayag man ni Basas nga wala ini nagbaton sang ticket nga gin-isyu sa iya sang mga opisyal kag pagbayad sang P300.00 bilang penalidad sa baylo nagbuya pa ini sang tinaga nga “ticketi niyo ko kay kasuhan ko kamu”, butang nga ginkahadlok sang mga opisyal.
Mahibaluan nga 24 oras ang operasyon sang POSU sa amu nga banwa agud magpangdakop sang mga illegal nga nagaparking sa higad sang dalan kung sa diin sa oras sang gab-i madamo ang napagkit nga nagakaladisgrasya bangud sa mga truckings kag dalagko nga mga truck nga ginahimo palahuwayan ang dalan sa ila banwa.
