ROXAS CITY – Naghatag sang paathag si Pueblo Philippines Logistics and Transport Services, Inc. (PPLTSI) Head Lorne Osorio natuhoy sa operasyon sang mga mini-buses sa siyudad nga naga-biyahe Roxas City Integrated Transport Terminal-Culasi kag Banica vice-versa.
Ini ang kasunod sang ginpalab-ot nga reklamo sang grupo sang mga tricycle drivers sa Bombo Radyo.
Suno kay Osorio, makabig nga legal ang pagbiyahe sang mga mini-buses bangud samtang ginahulat pa nila ang prangkisa gikan sa Land Transportation Franchising and Regulatory Board (LTFRB), may yara sang Provisional Authority gikan sa nasambit nga ahensiya nga nagahatag sang 90 diyas nga pahanugot para sa operasyon sang mga mini-buses.
Apang suno kay Osorio, sa masunod nga semana lauman nga magaabot na ang ila prangkisa gikan sa LTFRB.
Pag-abot naman sa ginareklamo sang mga tricycle drivers nga paglabay sang mini-buses sa Legaspi kag Burgos Street nga indi sakop sang ila ruta, suno kay Osorio nga ‘humanitarian consideration’ lamang ang ginahimos ang mga drivers sang mini-bus kun maghinyo ang mga pasahero sa ila nga sa amo nga lugar sila manaog.
Apang kasunod sang nasambit nga reklamo ginpasiguro ni Osorio nga indi na maglabay pa ang mga mini-bus sa mga lugar nga indi sakop sang ila ruta.
Pag-abot naman sa ginaalegar sang mga tricycle drivers nga wala nagasunod ang mga drivers sang mini-bus sa ila taripa, suno kay Osorio nga kun kulang ang sensilyo sang pasahero, ila ini ginakonsiderar kag ginabaton bangud mas ginapakamaayo nila nga magshort-charge sa baylo nga mag-overcharge sa mga pasahero.
Ginklaro ni Osorio nga wala nila ginakabig nga kakompetensiya ang mga tricycle drivers kag operators.
Lauman man suno kay Osorio sa masunod nga mga inadlaw nga madugangan pa ang mga naga-biyahe nga mga mini-buses sa siyudad nga maga-biyahe padulong sa Barangay Dumulog, Dayao kag Libas.
