CUARTERO, CAPIZ – Hugot nga ginpanginwala sang pamunuan sang Putian National High School ang namensyonar sa hearing sang Senate panel on public order and dangerous drugs kun sa diin nalakip ang ila buluthuan nga may nagakahinabo nga recruitment activity sang Communist Party of the Philippines – New People’s Army (CPP-NPA).
Sa pagpakig-angut sang Bombo Radyo kay Mr. Hernan Degala Duran, School Principal sang amo nga eskwelahan, ginkakibot gid sini sang iya mahibaluan nga nalakip sa listahan ang ang ila buluthuan nga may aktibidad sang NPA recruitment.
Suno kay Duran, seryoso ini nga alegasyon kag may negatibo nga impact sa ila eskwelahan.
Pahayag pa sini nga sa 33 ka tuig niya nga miyembro sang faculty sang Putian NHS, wala sila sang may na-monitor nga may ara sila sang estudyante nga nag-untat kag nagsulod sa hublag.
Kalaw-ay suno sa ila bahin ang amo nga alegasyon bangud sa pagkamatuod madamo sila sang professional nga graduates kag ang iban nagatrabaho sa iban nga pungsod.
Ginahinyo sini sa mga natungdan nga ahensya sang gobyerno nga magpakita sang ebidensya ukon datos sa publiko nga makapamatuod nga insakto ang ila alegasyon.
Sa karon may ginadihon na sila nga position letter nga naga-deny sa mga alegasyon.
Matandaan sa ginpatigayon nga hearing sang Senate panel sa public order and dangerous drugs, nagpanguna sa listahan ang Putian National High School sa 23 ka mga buluthuan nga gintumod ni PNP Directorate for Operations Colonel Randy Arceo nga may nagakahinabo nga recruitment activity sang rebelde nga grupo.
