ROXAS CITY, CAPIZ- Preparado na ang mga security measures sang pamunuan sang Roxas City Integrated Transport Terminal (RCITT) sa pagdugok sang mga pasahero nga estudyante sa tion sang pagbukas sang klase sa Hunyo 16.
Sa interview sang Bombo Radyo kay Mr. Victor Arcenas, Head sang Roxas City Integrated Transport Terminal, ginpahayag nga ginalauman nila kada tuig ang pag damo sang pasahero nga mga estudyante nga magapadulong sa syudad sang Roxas, kun sa diin preparado naman ini sila bangud sa ila ginpatigayon nga mga preparasyon.
Dugang pa sini, pila ka mga preparasyon nga ila ginpatigayon amu ang pagpahamtang sang presensya sang mga kapulisan, inspection sa palibot sang ila mga personnel agud malikawan ang mga emerhensya nga magluntad nga kun sa diin suno sa iya ang sa gihapon kasubong sang nagliligad nga mga tinuig nga ila nga mga preparasyon.
Nahibaluan, nga pag-abot naman sa operasyon sang mga salakyan, ang Ceres Bus ang magapadayon sang full-time operation sa adlaw-adlaw, kag ang iban naman nga pampasahero nga mga behikulo maga-byahe man apang asta lang mag alas siete sang gab-e bangud natalana man ang pagsara sang Roxas City Integrated Transport Terminal sa amo nga oras.
With a report from Bombo Francis Biñas
