ROXAS CITY – Magapatigayon sang maid-id nga imbestigasyon ang pamunuan sang Roxas Memorial Provincial Hospital (RMPH) natuhoy sa pila ka mga alegasyon kag reklamo nga ila nabaton gikan sa pamilya sang mga pasyente nga wala ginhatagan sang nagakaigo nga pagtamud sang mga doktor kag nurses.
Ini ang ginpahayag ni Jhoanna Cruz-am, hospitals spokesperson kag head sang Quality Management and Customer Relations Center sang mainterview sang Bombo Radyo.
Suno kay Cruz-am nga magapatigayon sila sang imbestigasyon sa mga department heads, nurses kag mga doktor sa nasambit nga ospital agud mahatagan sang solusyon kag sabat ang mga ginahaboy nga alegasyon sa ila sang pila ka mga himata sang mga pasyente nga ginaalegar wala ginhatagan sang nagakaigo nga pagtamud.
Natalana man nga magpatigayon sang seminar ang pamunuan sang nasambit nga ospital agud mapaintiendi sa mga nurses kag doktor’s kun ano ang ila mga obligasyon kag dapat nga pagtratar sa pamilya sang mga pasyente.
Ginpahayag man sang tagpamaba sang nasambit nga ospital nga indi pa sila sa karon makahatag sang pahayag natuhoy sa mga ginareklamo sa ila ospital.
Kalakip sa ila paga-imbestigahan ang kaso sang pagkamatay sang apat ka mga pasyente sa Intensive Care Unit (ICU) sa Roxas Memorial Provincial Hospital sa sulod lamang sang isa ka adlaw sadtong nakaligad nga Disyembre 25, 2019; ang sobra-sobra nga dosage sang bulong nga ginturok sa 7 katuig nga bata kag ang indi insakto nga pagtratar sa pamilya sang mga pasyente.
Samtang, nagpasalig naman ang pamunuan sang RMPH nga sa tion nga maguwa na ang resulta sang ila patigayunon nga imbestigasyon gilayon nila ini nga aksyunan kag hatagan sang nagakaigo nga solusyon agud indi na maliwat pa ang pila ka mga insidente.
