ROXAS CITY – Personal nga nagpaathag ang pamunuan sang Roxas Memorial Provincial Hospital (RMPH) angut sa isyu nga pagkamatay sang apat ka mga pasyente nga yara sa Intensive Care Unit (ICU) kasunod sa pagpalya sang generator set sang naglaslas ang bagyo Ursula sa probinsiya sang Capiz.
Ginpahayag ni Dr. Omar Mejia, tagpamaba kag OIC sang RMPH sang natabo ang insedente nga antes pa naglaslas ang bagyo, may ginhimo na nga precautionary measures ang talatapan.
Kalakip diri ang pagsigurado sang tagdumalahan nga may nagakaigo nga staff ang ospital, may suplay sang bulong, pagkaon kag kagamitan kag na-preparar ang generator set sa posible pagkadula sang suplay sang kuryente.
Aminado ang opisyal nga makapila ka beses gid man nga nagpalya ang gen set sang ospital sang nagbrown sa diin sang gin-assess sang nagtrouble shoot nga maintenance crew, natukiban nga na-discharge ang battery, rason nga nagdesisyon nga magbakal na lamang sang bag-o nga baterya.
Ginklaro man sini nga humalin lamang las 7 sa gab-I kag nagpaandar ang generator set las 9 sa gab-I sang Disyembre 25, 2019.
Nahibaluan nga Disyembre 26, 2019 alas 9 sa aga sang nagbalik ang power supply sang Capelco sa ospital.
Gintumod man ni Mejia nga critically ill ang apat ka mga pasyente nga yara sa ICU kag gin-imporma na ang pamilya sang nasambit nga mga pasyente sa kondisyon sang ila mga himata.
Magluwas diri, nagpirma sang waiver ang pamilya sang mga pasyente nga indi na pag-i-resuscitate.
