Pamunuan sang Traffic Management Unit wala sang nakita nga paglapas sa ordinansa sang syudad ukon sa Comelec nga pagadakpon ang mga tricycle nga may yara sang election posters sang mga kandidato nga nagapadalagan

ROXAS CITY – Wala sang mahimo ang pamunuan sang traffic management unit ukon TMU angut sa mga tricycle drivers kag operators nga nagapasugot nga magpahamtang sang mga election posters kag election paraphernalia sa ila mga tricycle.

Ini ang ginpahayag ni Mr. Junie Jun Hervias, hepe sang TMU sang mainterview sang Bombo Radyo.

Suno kay Hervias nga wala sang ordinansa gikan sa city council ukon sa Commission on Elections nga nagadumili sa mga tricycle drivers kag operators nga magpahamtang sang mga election paraphernalia sang mga kandidato sa ila tricycle.

Ginpahayag ni Hervias nga wala man sila sang may nakita nga paglapas sandig sa ginapatuman nga traffic rules sa siyudad samtang ginahulat nila ang desisyon sang City Council kun ipatuman ang pagpangdakop sa mga tricycle drivers nga nagapasugot pahamtangan sang mga election paraphernalia sang pulitiko.