Malipayon ang pamunuan sang West Visayas State University (WVSU) sa September 2026 Librarian Computer-Based Licensure Examination bangud nakakuha ini sang 100 percent nga passing rate matapos makapasar ang tanan nga 14 ka examinees sang unibersidad .
Sa interview sang Bombo Radyo kay Dr. Joselito Villaruz, President sang West Visayas State University (WVSU), iya ginpahayag nga nakibot ini sang mahibaluan ang resulta apang mas labaw ang kalipay bangud tanan nga nagkuha sang exam ang nakapasar.
Suno kay Villaruz, daku man nga kadungganan ang gindala ni Louise Angelika P. Pahilanga, isa sa mga graduate sang WVSU College of Information and Communications Technology matapos makuha ang Rank 2 sang pasinawan kag may rating nga 92.40 percent.
Si Pahilanga amo man ang ginkilala nga Most Outstanding Graduate in Academics sang WVSU Class of 2026.
Pahayag pa niya, number 1 man ang WVSU sa overall performance sa mga college institution nga may pito ukon mas madamo pa nga examinees kag may passing rate nga yara sa 85 percent pataas.
Samtang sa kabug-usan nga passers, 760 sa 1,014 ka examinees, ukon 74.95 percent, ang nakapasar sa Librarian Licensure Examination nga ginpatigayon sang Setyembre 3 kag 4.
Nagalaum man ang natungdan nga ang ini nga kadalag-an magserbe nga inspirasyon sa younger generation nga magtimakas sa pag-eskwela para sa masanag nga palaabuton.
