Ginsuspinder sang FIFA ang soccer federation president sang Panama nga si Manuel Arias matapos sini nga tawgon nga matambok ang isa ka star player sang ila nga national team.
Bangud sini, pagabawalan si Arias nga pagadumalahan ang Panamanian Football Federation nga kilala sa tawag nga Fepafut sa sulod sang anom ka bulan.
Indi man ini pwede nga magpasakop sa mga football practice kag iban pa nga aktibidad.
Sandig sa opisyal nga report sang FIFA, natabo ang body shaming comment matapos sini nga tawgion nga matambok si Panama women’s national team star player Marta Cox.
Mahibaluan nga wala nakaabante ang nasambit nga team sa international tournament sang nakaligad nga tuig kun sa diin ginpahayag ni Cox nga ang pinakadako nga problema sang hubon amu ang kakulangan sang pasilidad.
Gilayon naman ini nga ginpakamalaut ni Arias kag ginhambalan ang star player nga matambok ini, napabay-an na ang kaugalingon, kag indi na masyado makahulag sa field.
Naghimo si Cox sang kasaysayan sa Panama sadtong 2023 matapos ginpasulod ang pinaka-una nga goal sang Panama sa Women’s World Cup. Apang suno kay Arias, wala sang ihibalo si Cox sa football program sang Panama sa sulod sang pila ka tuig.
Gilayon naman nga ginpakamalaut ni Cox ang mga komento sang ila nga football president kag nagpaandam nga magabiya ini sa national team kun magapadayon ang kasubong nga mga komento gikan kay Arias.
