ROXAS CITY – Ginpanginwala sang alkalde sang Panay ang mga alegasyon batuk sa iya nga wala ini halos nagapadulong sa munisipyo sang banwa kag yara na lamang sa ila balay nagatinir.
Suno kay Mayor Felipe Barredo, wala ini sang kamatuoran kag lunsay mga alegasyon gid lamang agud magguba siya ilabi na sa mga pumuluyo sang nasambit nga banwa.
Ginpahayag sini nga indi man sang matuod nga indi siya ang nagakasal sa mga ‘civil weddings’ sa munisipyo bangud wala man sang iban nga pwede makapirma magluwas sa iya bilang siya ang local chief executive sang banwa.
Siya ang personal nga nagapanguna sa mga nagapakasal sa munisipyo apang gin-ako sang alkalde nga kay mga ginakasal siya sa iya lang mismo nga balay.
May mga transaksiyon man suno sa iya nga sa iya balay ginahimo bangud ang balay sini ang iya ginakabig nga ‘extension’ sang iya nga opisina.
Ginpanindugan man sang alkalde nga nagapabilin nga estable ang kondisyon sang iya ikaayong lawas kag nakahanda siya nga pamatud-an ini.
Apisar wala direkta nga ginsabat sang alkalde kun cancer-free na gidman ini, nagpahayag lamang siya nga depende na ini sa paghangop sang tawo apang suno sa iya nga ang cancer cells ang indi man madula sa lawas sang isa ka cancer patient.
