Nagatukod sang maid-id nga plano si Panay Mayor Jonathan Besa agud maresolba ang natabo nga pagkarumpag sang taytay sa Barangay Agojo, Panay, capiz.
Sa interview sang Bombo Radyo kay Mayor Besa, iya ginpahayag nga sang bulan sang Disyembre sang tinalikdan nga tuig 2025, nagpalab-ot na sa iya ang Punong Barangay agud pangayuan sang bulig ang nagalapad nga litik sa palibot sang taytay nga gilayon man nga gin-aksyonan sang alkalde.
Suno kay Mayor Besa,ginpa-tsekyar niya ang nasambit nga taytay sa First District Engineering Office sang Department of Public Works and Highways kag ginpasa sa Regional Office.
Pahayag pa niya, isa ka immediate ukon temporaryo nga solusyon ang mahimo sang ila talatapan ang pagpahamtang sang steal plate sa nasambit nga taytay agud indi ma-isolate ang mga pumuluyo nga wala na sang iban pa nga paga-agyan.
Aminado man ang alkalde nga indi bastante ang pondo sang local government unit sang Panay nga ipakay-o ang nasambit nga taytay rason nga kinahanglan gid ang bulig gikan sa national government.
Nahibaluan nga tuig 1986 pa sang gintukod ang amo nga taytay.
Nagapanawagan man ang natungdan sang pag-intindi sa tanan nga pumuluyo sang Barangay Agojo, bangud indi simple nga imprastraktura ang isa ka tulay kag kinahanglan sang maid-id nga pagdiskusyon.
