ROXAS CITY – Makaekspektar ang pumuluyo sa banwa sang Panay nga mangin intsakto ang pagdumala sang alkalde sa bug-os nga termino.
Sa interview sang Bombo Radyo kay Mayor Vicente “Vic” Bermejo sang Panay, suno diri sa sulod sang 100-diyas nga iya pagpanabaraho gin-organisar niya ang mga empleyado agud masanto ang mga ini sa ila trabaho, nadihon man ang programa nga agri-fisheries development kun sa diin ginkay-o ang mga irigasyon sa Panay.
Ginpauswag man sini ang bantay dagat kun sa diin ila ginalantaw kun gasunod sa regulasyon ang mga manugpangisda.
Dugang pa sini nga nagapreparar na sila para sa Christmas Village nga tradisyon na sa ila banwa.
Apisar wala pa nasugudan ang pagpakay-o sang dalanon bangud bag-o lang naaprubahan ang AIP sang probinsya, ginsiguro sini nga matigayon ang ini nga proyekto sa mga palaabuton nga tiyempo.
Aminado si Mayor Bermejo nga medyo nabudlayan siya bangud nagka-problema sa civil service sa sulod sang munisipyo kun sa diin 7 ka departmento ang wala sang department heads.
Madamo pa siya suno diri sang plano apang kinahanglan niya diri ang kooperasyon sang iya mga empleyado.
Ginapromisa niya sa iya pumuluyo nga matuman ang iya mga plano kag mga programa para sa ikaayo sang ila banwa.
