Nagapati ang Panay Municipal Police Station nga wala sang foul play sa pagkalumos sang isa ka estudyante sa Barangay Agbalo, Panay, Capiz.
Ang biktima amo si alyas “Venz,” 16-anyos kag residente sang Barangay Magubilan kag isa ka estudyante sang Don Felix Balgos National High School.
Sa interview sang Bombo Radyo kay Police Captain Eric Deocampo, officer in charge sang Panay Municipal Police Station, nahibaluan nga nag-try out pa ang biktima kaupod ang iya ang iya coach kag mga team sa volleyball antes ini nagpauli.
Suno kay Deocampo, ginhambalan pa ini sang mga residente nga indi magtabok apang nagdesisyon ini nga maglangoy na lang agud kuhaon ang baruto sa pihak nga bahin sang suba.
Samtang nagalangoy ini kag yara na sa tunga-tunga hinali nalang ini nga nagsinggit sang tabang sa mga tawo agud kuntani nga mabuligan siya apang dalayon na lang ini nga nagsarurot padalum kag wala na nakabutwa.
Gilayon naman nga nagpangayo sang bulig ang pila ka mga residente sa mga otoridad kag pag-abot sa lugar nagpatigayon ini sang Search ang Retrieval Operation agud nga kuntani maluwas pa ang biktima.
Pahayag pa niya, aga na sang makit-an ang bangkay sang biktima sa bulig sang manuglaya nga nakalambat sa iya nga lawas.
Dugang pa sang natungdan, ginatun-an na ang pagbutang sang pila ka mga signages kag suga sa lugar.
