ROXAS CITY – Patay ang isa ka panday matapos ginapatihan nabiktima sang hit-and-run sa Barangay Salocon, Panit-an, Capiz.
Ginkilala ang biktima kay Jomer Andrade, 40 anyos kag residente sang nasambit man nga lugar.
Mahibaluan nga nakit-an na lamang sang mga naglabay nga tricycle drivers ang lawas sang biktima sa kilid sang national highway kag wala na sang kabuhi.
May nakit-an nga pilas sa ulo sang biktima nga posible resulta sang pagkabunggo sa iya nga nagresulta sa iya kamatayon.
Suno kay Mariano Barroa, kaupod sini nga nag-inom ang biktima kagab-i kag gindul-ong pa ini papuli.
Apang posible nga nagbalik pa ang hubog nga biktima rason nga nabungguan ini sang wala pa matumod nga salakyan.
Sa karon padayon ang imbestigasyon sang mga kapulisan sa insidente agud matumod ang salakyan nga nakabunggo sa biktima.
