ROXAS CITY – Pilason ang isa ka 52-anyos nga panday matapos nga ginaalegar ginluthang sang wala matumod nga persona sa Malipayon Village, Barangay Tiza, Roxas City.
Ginkilala ang biktima nga si Robert Lima 52-anyos sang Urban Poor Subdivision, Barangay Milibili sining siyudad.
Base sa inisyal nga imbestigasyon sang Roxas City Police Station nga samtang sakay ang biktima sa iya Kawasaki nga motorsiklo sang hinali na lamang ini nga ginluthang sang wala matumod nga suspek gamit ang .45 pistol nga armas luthang sakay sa Yamaha mio nga motorsiklo.
Bangud diri, nag-angkon sang pilas sa nawala nga porsyon sang iya likod lapos sa dughan ang biktima nga gilayon naman gindala sa ospital agud dapatan sang nagakaigo nga pagbulong.
Samtang, gilayon naman nga nagpalagyo ang suspek matapos ang insidente.
Padayon naman ang hot pursuit operation sang mga kapulisan agud matumod ang suspek.
Ginapahayag nga sakay ang suspek sa motorsiklo nga nagaduag itom.
Suno sa tiayon sang biktima nga si Rina, wala ini sang ideya kun sin-o ang posible suspek sa pagtiro sa iya nga bana.
Ginpahayag sini nga wala man nakasugid ang iya bana nga may kontra ini ukon problema.
