Ginpanginwala ni anay Senador Panfilo Lacson ang nagalapta nga impormasyon nga may kaangtanan kuno ang ginahambal nga bag-o nga coup attempt sa isyu sang Charter Change ukon Cha-cha. Suno kay Lacson, wala sang nagakaigo nga ebidensya nga makapamatuod nga ang ginakabig nga destabilization efforts may direktang koneksyon sa pagbag-o sang Konstitusyon.
Ginpahayag niya nga indi dapat dayon patihan ang mga wala napamatuoran nga impormasyon nga nagalapta sa publiko bangud mahimo ini nga magdul-ong sang kalibog kag dugang nga tensyon. Ginlaygayan man niya ang publiko nga mangin mabinantayon kag magsalig lamang sa opisyal kag beripikado nga impormasyon halin sa mga kinauukdan nga ahensya sang gobyerno.
Dugang pa ni Lacson, importante nga mapabilin ang kalinong kag istabilidad sang pungsod kag indi paggamiton ang mga sensitibo nga isyu para sa pamulitika ukon pagpangdulot sang kahadlok sa publiko.
