Nagpaandam si House prosecutor kag Bicol Saro Party-list Rep. Terry Ridon nga posible magapangatubang sang procurement complaint ang Senado kon mahatag ang request ni Vice President Sara Duterte nga ang Senate Impeachment Court ang magbayad sang pagkaon kag iban pa nga logistical expenses sang iya defence team sa impeachment trial.
Suno kay Ridon, daw kaangay nga luyag sang kampo sang Bise Presidente nga maggamit sang ila kaugalingon nga caterer apang ang Senado ang magabayad, nga suno sa iya mahimo tunaan sang procurement issue.
Ginpanindugan man sini nga wala sang obligasyon ang Senate Impeachment Court nga bayaran ang pagkaon ukon iban pa nga galastuhan sang prosecution ukon defense panel.
Dugang pa ni Ridon nga lunsay may gindedikar nga pondo ang Office of the Vice President kag ang Kamara para sa ila partisipasyon sa impeachment proceedings.
Pahayag pa sini, yara sa Senado ang desisyon kun ihatag ukon indi ang kasubong nga request.
