ROXAS CITY – Karsel ang gintup-an sang isa ka pangayaw matapos nga nagpanggubat sa isa ka puloy-an nga may bitbit nga armas-luthang, sa Barangay Balucuan, Sigma, Capiz.
Ginkilala ang suspek kay Reigem Bergantinos, 49-anyos, kag residente sang Brgy. Mambog, Banga, Aklan.
Sa pagpakig-angut sang Bombo Radyo sa Sigma MPS, nagaguwa sa imbestigasyon nga alas-10 kagab-i sang Sabado, sang nag-abot ang suspek sa puloy-an nanday Jenalyn Alayon, pinaagi sa pagbunggo-hungod sang iya motorsiklo sa kudal sang nasambit nga tagbalay.
Nakit-an man nga may bitbit nga .38 calibre nga armas-luthang si Bergantinos, rason nga gin-apprehend ini sang mga katapo sang Barangay Tanod kag ginpatawgan sang mga kapulisan.
Wala sang may napresentar nga dokumento ang suspek sa nasambit nga armas-luthang rason nga magapangatubang ini sang kaso nga paglapas sa RA 10591 ukon Comprehensive Firearms and Ammunition Act.
Nahibaluan nga yara sa impluwensiya sang makahulubog nga ilimnon si Bergantinos kag ginaalegar may kontra sa amu nga lugar.
