ROXAS CITY – Karsel ang gintup-an sang 23-anyos nga lalaki matapos nga nagpangawat sang bisekleta sa Dinggoy Roxas Civic Center, sa syudad sang Roxas.
Ginkilala ang suspek kay Alvin Jan Estrera, estudyante kag residente sang Barangay Lapuz Sur, Iloilo City.
Sandig sa inisyal nga imbestigasyon ni PSSg. Emil Caldeo sang Roxas Component City Police Station, nga sang tinalikdan nga Mayo 6, sini nga tuig, sang gin-park sang 16-anyos nga lalaki ang iya bisekleta sa guwa sang Civic Center agud maglantaw sang basketball.
Apang sa iya pagguwa, wala na ang amu nga bisekleta.
Natigayon nga madakpan ang suspek, matapos nga ginpost sini sa ‘Marketplace’ sa Facebook ang bisekleta kag nakit-an man sang biktima rason nga gintransaksyon niya ang suspek.
Nahibaluan nga nagpadulong gid lamang ang suspek sa syudad sang Roxas agud magbisita sa iya nobya.
Sa karon, natalana nga pasakaan sang nagakaigo nga panumbungon ang nasambit nga suspek.
