Ginkwestyon ni Senator-Judge Kiko Pangilinan si OVP Assistant Chief of Staff Lemuel Ortonio kon ngaa milyon-milyon nga confidential funds sang Office of the Vice President (OVP) ang gingasto sa mga bulong halin Disyembre 2022 tubtob Setyembre 2023.
Suno kay Pangilinan, P122 milyon nga cash ang ginhatag bilang reward sa informant matapos ang ila surveillance operations, kag ang iban sini ang gingamit sa pagbakal sang mga bulong.
Pahayag ni Ortonio, indi sini maathag kon ngaa amo ini ang gingastuhan sang kwarta.
Apang, suno sa impormasyon nga iya nabaton ang halin sa security officer, amo ini ang mga kinahanglanon nga ginpangayo sang mga informant ukon agents sang amo nga tion.
Gin-usisa man ni Pangilinan kon ngaa wala ini ginpamangkot ukon gin-aksyonan ni Ortonio, ilabi na nga posible nga wala naagi sa bidding ang pagbakal sang mga bulong.
Sabat ni Ortonio, nahibaluan lamang niya ang parte sa food kag medicine supplies bilang rewards sang nakabaton sila sang Audit Observation Memorandum (AOM) halin sa Commission on Audit (COA).
