ROXAS CITY, Capiz – Pagatalakayon sang Sanguniang Panlalawigan sang Capiz ang nagkalain-lain nga importante nga legislative matters sa Regular Session No. 59 nga ginsugudan sini nga Agosto 18, 2026, lakip ang mga bag-o nga hagna, resolusyon, local legislative acts, committee reports, kag urgent matters nga may kaangtanan sa serbisyo publiko kag pagdumala sang pondo sang probinsya.
Lakip sa mga yara sa agenda ang proposed ordinance ni Board Member Jose Fulgencio A. Del Rosario para sa pag-establish sang “Senior Citizens’ Free Movie Day” sa Capiz, nga maghatag sang libre nga admission sa sinehan sa mga kwalipikado nga senior citizens kada Martes. Pagatalakayon man ang resolusyon nga nagapangabay sa National Commission on Indigenous Peoples (NCIP) nga i-fast track ang approval kag issuance sang Certificate of Ancestral Domain Title (CADT) para sa Panay Bukidnon Indigenous Cultural Communities/Indigenous Peoples sa Tapaz kag Jamindan. Yara man sa committee reports ang mga local measures sang banwa sang Panay, Pilar, kag Roxas City lakip ang supplemental investment program, development fund kag augmentation sang appropriations para sa personnel benefits kag monetization of leave credits.
Samtang, pagatalakayon man ang application sang USWAG Dulangan Small Fisher’s Association para sa accreditation bilang peope’s organization, pati ang Memorandum of Agreement sa Philippine Red Cross para sa provision of blood services sa probinsya.
Ginpabutyag nga ang Order of Business amo pa lamang ang opisyal nga agenda sang session, gani indi buot silingon nga gin-aprubahan na ang mga nasambit nga hagna, resolusyon, kag iban pa nga legislative matters. Ang final nga aksyon maga depende sa deliberasyon kag desisyon sang Sangguniang Panlalawigan sang aktuwal nga session.
