Posible nga maka-eksperyensya liwat sang heatwave ang France subong nga weekend kag sa masunod nga semana apisar nga wala pa lubos nga naka-recover ang pungsod sa tuman ka grabe nga heatwave nga nagsugod sang Hunyo 17.
Suno kay Bombo Leo Brisenio, International Correspondent sa Paris, France, apisar ginalauman nga maganubo sang gamay ang temperatura sa Miyerkules kag Huwebes, ginalauman nga magainit liwat ang panahon sa Biyernes, partikular sa nabagatnan nga bahin sang pungsod.
Suno kay Brisenio, base sa forecast sang French national weather service, posible nga maglab-ot ukon maglapaw sa 35 degrees Celsius ang temperatura sa southern France sa Domingo, samtang mahimo nga maglab-ot sa 36 tubtub 37 degrees Celsius ang temperatura sa pila ka mga syudad.
Dugang sini nga apisar ginalauman nga ma-lift ang orange heatwave alert sa tanan nga departamento sa Huwebes, posible nga i-impose ini liwat kun padayon nga magtaas ang temperatura.
Dugang pa ni Brisenio, kun ini ang matabo, ini na ang ikatlo nga heatwave nga ma-eksperyensyahan sang France subong nga tuig.
Samtang, padayon naman ang panawagan sang mga otoridad sa publiko nga magpabilin nga alerto, mag-inom sang bastante nga tubig, likawan ang malawig nga exposure sa adlaw, kag magsunod sa mga advisories sang gobyerno samtang ginabantayan ang posibilidad sang isa pa ka tuman nga heat wave sa masunod nga mga inadlaw.
