ROXAS CITY – Nagsumpa na bilang panibag-o nga Punong Barangay sang Barangay Baybay si Kapitan Erwin “Nonoy” Oroceo kay Mayor Ronnie Dadivas kaina sang aga.
Sa interview sang Bombo Radyo kay Kap. Erwin Oroceo, siya ang ginpili ni anay Kap. Rey Magallanes nga magatal-os sa posisyon matapos nagdaog ini sa pagka-konsehal sa syudad.
Suno diri, halo nga emosyon sang kulba kag excitement ang iya nabatyagan bangud indi mahupos ang obligasyon sang kapitan ilabi pa subong nga madamo ang gakalatabo kasubong sang Covid-19, apang ginsiling sini nga tinguhaan niya nga magampanan ang iya obligasyon.
Matandaan nga ikaduha na kuntani subong sa tatlo ka termino ni Kap. Oroceo bilang 1st kagawad sang Barangay Baybay kag wala pa ini sang may matul-id kun sin-o ang iya ipabulos sa anay posisyon.
Sa pihak nga bahin, nagapasalamat ang punong brgy. kay Mayor Dadivas sa pagbulig kay anay Kap Magallanes bangud siya ang natagaan man oportunidad nga idumala ang ila barangay.
Gapati siya nga magampanan ni konsehal Magallanes ang obligasyon sini pareho sang pagdumala sini sa Brgy. Baybay nga nangin madinalag-on kag bug-os nga pumuluyo sang Baybay ang nagasuporta sa iya.
Dugang pa sini, igapadayon niya ang mga proyekto kag pagdumala agud mapa-uswag pa ang ila barangay, indi man siya makapasalig, apang himuon niya ang kutob sang masarangan agud mahatag ang maayo nga serbisyo sa pumuluyo.
Panugyan ni punong barangay Oroceo sa pumuluyo, tagaan siya sang tsansa nga ipakita kun ano siya ka sensiro kag mapakita niya ang pagpalangga kag pagpa-umwad sang barangay baybay.
