Nakarecord sang Isa ka kumpirmado nga kaso sang Nipah virus infections ang Rajshahi Division, Bangladesh.
Suno sa International Health Regulations National Focal Point, nag-angkon sang hilanat ang pasyente sang Enero kag nakumpirma ini pinaagi sa laboratory test makaligad ang pila ka adlaw.
Base sa imbestigasyon, wala ini sang travel history apang nag-inom sang duga sang date palm juice, isa ka kinaandan nga ginahalinan sang infection.
Suno sa Ministry of Health and Family Welfare of Bangladesh, 35 ka mga tawo ang nakasalamuha sang pasyente ang hugot nga gina-monitor kag lunsay nagnegatibo man sa Nipah virus.
Ang Bangladesh kilala nga naga-eksperyensya sang outbreak sang Nipah virus, masami halin sa Disyembre tubtob Abril, kadungan sang panahon sang pag-ani kag pagkonsumo sang duga sang date palm.
Samtang, ginpatuman sang gobyerno ang mga tikang sa ikaayong lawas agud malikawan ang paglapta sang balatian, lakip na ang intensive surveillance kag impormasyon sa publiko.
Sa subong ginakabig sang World Health Organization nga manubo ang risgo sang Nipah virus sa pungsodnon,regional kag global level, kag manubo man ang posibilidad sang paglapta sini sa iban nga pungsod.
