ROXAS CITY – “Indi maayo nga pagpatay kag kaangay nga paghalit ang ginhimo sa ila utod”.
Ini ang matigdas nga mga tinaga nga ginpahayag ni Edgar Olino, magulang sang 47-anyos nga lalaki nga ginlabo patay sa Sitio Sinandigan, Barangay Mianay, Sigma Capiz.
Sa interview sang Bombo Radyo kay Olino, ginpahayag sini takna alas 7:00 sang aga sang magapadulong kun tani sa tindahan ang iya manghod agud magbakal sang bulong sang iya ginahuptan nga manok sang hinali na lamang nga ginlabo sang suspek nga si Ondot ang iya manghod nga si Oloy sa liog.
Suno kay Olino, nagbulid-bulid paubos sa may kantil ang iya manghod apang ginsunod pa ini sang suspek kag wala untat nga ginlabo sa likod kag sang wala pa ini makontento daw kaangay nga ginlugot pa sini ang liog sang iya manghod.
Ginapahayag man nga sang iya paglakat nasugata pa niya ang suspek sakay ang iya tricycle, apang wala niya ginadahum-dahum nga ginahulat sini ang iya manghod kag may tuyo nga patyon.
Mahibaluan nga sang matabo ang makahalanusbo nga insidente, wala sa ila lugar si Olino kag nakabaton na lamang siya suno diri sang impormasyon nga ang iya manghod ginlabo sa ila lugar kag yara na sa isa ka punerarya.
Makabig man suno diri nga abyan nila ang suspek bangud nakaupod man nila ini sa paginum-inum, apang wala man ini sang may ginatuad nga may kontra ukon kalain sang buot sa iya manghod.
Sa karun, ginapanindugan sang pamilya Olino ang prinsipyo sang ila pamilya nga mabayaran kag mapanabat ang suspek sa iya ginhimo nga pagpanglabo-patay sa ila manghod.
Samtang, padayon naman ang pag-asikaso sang mga kapulisan sa mga dokumento agud mapasakaan na sang nagakaigo nga kaso ang suspetsado kag sa karun yara na sa isa ka punerarya ang bangkay sang biktima.
