ROXAS CITY – Wala sang may nakit-an nga posible mga suspetsado sa pagpanghold-up sa isa ka collector sa Barangay Timpas, Panitan Capiz ala 1:00 sang hapon sadtong Hunyo 10,2023.
Sa interview sang Bombo Radyo kay PSSG. Dale Daliva imbestigador sang Panitan Municipal Police Station, ginpahayag sini nga malayo ang panaysayon sang biktima sa natabo bangud wala nila nakit-an ang ginpahayag suspek sa pagpanghold-up pinaagi sa pagtsekyar sa lugar.
Matandaan nga ginkilala ang biktima kay Philip Beldia Cautivar 24-anyos kag residente sang Sitio Puntod, Barangay Dinginan, Roxas City.
Suno sa biktima, nakatapos lang ini sa pagpanukot sa iya kliyente sa Panitan public market kag padulong na kun tani Barangay Timpas sa amu nga banwa.
Apang pag-abot sa dalan nga under-construction may yara sang duha ka mga persona sakay sang Honda XRM nagaduag puti kun sa diin ang driver sini nagasuksok sang itom nga jacket, itom nga helmet samtang ang back rider naman ang nagasuksok sang itom nga bonnet kag brown nga bag kag nagdikit ini sa iya kag hinali na lamang nga ginbutong ang iya jacket rason sang iya pagkatumba.
Dugang pa ni Cautivar nga gintutukan siya sang armas luthang sang back rider kag diri nagdeklarar nga hold-up.
Nataban sang mga wala matumod nga suspetsado sa biktima ang kwarta nga P40,000 nga iya ginpangsuktan, 1 ka unit sang Sunelan cellphone kag madasig nga nagpalagyo sa direksyon nga padulong sa banwa sang Sigma.
Bangud sini, ginapadalman pa sang mga kapulisan ang insidente bangud posible suno diri nga indi matuod ang ginpaguha nga pahayag sang biktima.
Sa karun nagapadayon pa ang imbestigasyon sang mga otoridad angut sa insidente.
