PANIT-AN, CAPIZ – Ginpasalig sang Panit-an Municipal Police Station nga magabulig ang ila talatapan sa imbestigasyon sa nagluntad nga pagpang-ambush sa van sa Brgy. Aglalana, Passi City kun sa diin sakay ang duha sa tatlo ka mga biktima nga lunsay mga residente sang Barangay Bahit, sa nasambit nga banwa.
Sa interview sang Bombo Radyo kay PLt. Merry Chris Dela Cruz, hepe sang Panitan PNP nga nagahulat na lamang sila sang koordinasyon nagikan sa Passi City PNP para sa imbestigasyon.
Gintuad man ni Dela Cruz nga nagpasalig na sila sang police assistance sa mga biktima kag sa ila pamilya.
Ginkumpirmar man sang hepe nga nadakpan sa syudad sang Roxas si Dorado bangud sa pagduso sang iligal nga droga sadtong tuig 2008 kag may kaso nga frustrated murder sang tuig 2017 sa Panitan apang ginhilway sang 2018 matapos nga nagbayad sang bailbond para sa temporaryo nga kahilwayan.
Samtang, ginklaro sini nga wala sang rekord sa pulisya si Jomar Fuentes nga napatay sa nagluntad nga krimen.
Matandaan nga dead on arrival sa ospital sanday Jennylyn Griño nga tumandok sang Iloilo kag si Fuentes nga taga banwa sang Panit-an.
Masuwerte nga wala naigo si Jinnefer Opina ang driver sang gin-hire nga van sang mga biktima.
Nahibaluan nga nagikan ang van sa syudad sang Iloilo kag papuli kuntani sa Capiz sang ginpaarakan ang mga ini sang nag-overtake nga Toyota Vios nagaduag pula.
Sa karon nagapadayon ang imbestigasyon sang mga otoridad.
