PANITAN, CAPIZ – Nagapreparar na ang Panitan Municipal Police Station (MPS), sa koordinasyon sa Local Government Unit (LGU) kag mga force multiplier, para masiguro ang kalinong, katawhay kag seguridad sang publiko sa tion sang pagselebrar sang Undas.
Sa interview sang Bombo Radyo Roxas, ginpahayag ni Police Captain Ronald F Ton-ogan, Officer-in-Charge sang Panitan Municipal Police Station, nga tatlo ka sementeryo ang tutukan sang kapulisan, lakip ang yara sa Intampilan, Cogon kag Poblacion Ilaya.
Suno kay Ton-ogan magabutang man sang police assistance desk sa mga lugar nga madamo ang nagabisita agud magbulig sa pagdumala sang trapiko kag pagmonitor sa pagsulod kag paggwa sang mga tawo. May yara man sang minimum nga tatlo tubtob apat ka PNP personnel nga ideploy sa kada sementeryo.
Pahayag pa niya magabuligay sa operasyon ang mga medical personnel, Bureau of Fire Protection (BFP), barangay tanod kag iban pa nga force multiplier.
Suno kay PCPT. Ton-ogan, ipatuman ang operasyon sa idalom sang Incident Command System (ICS), nga nagatugot sa paggamit sang available nga manpower sang LGU agud mapabaskog ang seguridad kag pagresponde sa mga emerhensya.
Samtang, ginpahanumdom sang kapulisan ang publiko nga ginadumilian ang pagdala sang deadly weapon, makahulubog nga ilimnon kag baraha sa sulod sang sementeryo.
Apang indi man ginatugutan ang paggamit sang mabaskog nga sound system ukon videoke agud mapabilin ang kalinong kag pagtahod sa mga nagabisita sa ila mga napatay nga himata.
Dugang pa sang natungdan gin-imbetar man ang publiko nga siguruhon ang seguridad sang ila mga balay antes maghalin agud malikawan ang sunog kag pagpangawat.
Sa karon ginapahanumdom niya ang tanan nga magsunod sa mga patakaran kag regulasyon sang mga peace and order personnel, kag mangin alerto sa ila palibot agud malikawan ang krimen kag aksidente sa tion sang Undas.
