ROXAS CITY – Natalana nga pasakaan sang panumbungon nga Reckless Imprudence Resulting to Homicide, Multiple Serious Physical Injuries and Damaged to Property si Police Captain Alcer Monsera.
Suno kay Police Captain Gregg Anthony Salbang, Officer-in-Charge, Chief of Police sang Ivisan Municipal Police Station, ginatinguhaan nila nga mapasaka subong nga adlaw ang panumbungon sa Office of the Provincial Prosecutor agud mangin madasig ang dalagan sang imbestigasyon.
Dugang pa sini nga nagaguwa sa imbestigasyon nga si Police Captain Alcer Monsera ang nagamaneho sang Montero Sports nga salakyan. Apang nagpanugyan ini nga kung sino man ang may yara sang impormasyon nga indi si Monsera ang nagamaneho sang salakyan, mahimo nga magpadulong sa istasyon sang Ivisan Municipal Police Station agud makuhaan sang dugang nga impormasyon.
Matandaan nga madamo sang nagapahayag nga si Romelyn Baldado nga sakay sang Montero Sports ang nagamaneho sang salakyan sang natabo ang aksidente.
Suno kay Salbang, wala pa gid makuhaan tubtob sa karon sang dugang nga pagpahayag si Monsera bangud natalana ini nga igapaidalum sa ikaduha nga operasyon matapos nag-angkon sang mga kapilasan sa magkatuhay nga parte sang lawas sini.
Ginpasalig man sang hepe sang Ivisan MPS nga pagadasigon pa gid nila ang ila ginapatigayon nga imbestigasyon natuhoy sa insidente.
