Nanawagan si Department of Agriculture (DA) Secretary Francisco Tiu Laurel Jr. sa mga mamalidha nga ibalik ang regulatory powers sang National Food Authority (NFA) agud mapanubo ang presyo sang bugas.
Ang panawagan ang ginhimo sang DA chief, pila ka adlaw matapos ipaathag ni NFA Administrator Larry Lacson nga sarang sini nga makabaligya sang P38 kada kilo lamang sang bugas nga direkta sini nga mabakal sa mga mangunguma.
Suno sa isa ka pahayag ni Lacson, maluwas sa mga consumer ang barato nga bugas gikan sa NFA, makapaayo man ini sa mga mangunguma bangud mas makabakal pa sila sang madamo nga ani sa mga ini sa tion nga mabakante ang mga warehouse sang buffer stocks.
Samtang, sa pag-atubang sini sa Murang Pagkain Super Committee sa House of Representatives sang Miyerkoles, ginsiling ni Tiu Laurel nga kun ginbalik sa NFA ang ikasarang nga ibaligya sang direkta sa publiko ang mga bugas sini, mapilitan nga magnubo sang presyo ang mga trader, ilabi na ang mga nagpanunto sa pagbaligya sini kag maprotektahan ang interes sang publiko.
Dugang pa ni Tiu Laurel nga ang 6 milyon nga bags nga buffer stocks sang NFA nga pwede ibaligya sa mga balaklan ang makapagpanubo sang nagapabilin nga mataas nga presyo sang bugas sa merkado.
Bag-o ang 2019, ang NFA ang may sarang nga maghatag sang lisensiya sa rice traders kag mag- inspeksiyon sang warehouses sang mga ini agud matumod kun bastante pa ang suplay sang bugas.
Samtang, gin-athag naman ni Lacson nga sa gin-amyendahan nga Rice Tariffication Law (RTL), wala nahatagan sang mandato ang NFA nga magbaligya sa merkado.
