7 mos. old fetus, nasapwan sang isa ka basurero sa Roxas City

ROXAS CITY – Ginkakibot sang isa ka basurero sa Barangay Banica, Roxas City ang iya nasapwan nga eco-bag nga may sulod nga balde nga may pito ka bulan nga fetus.

Sa interview sang Bombo Radyo Roxas kay Rolando Bulquerin, ginpahayag sini nga nagapamasura siya sa lugar kun sa diin iya nakit-an ang daku nga eco-bag nga may sulod nga balde rason nga iya ini nga ginbukad.

Apang tuman na lamang ang iya nga kakibot bangud sang nakit-an nga fetus nga ginalangaw na.

Suno naman sa mga otoridad nga posible duha ukon tatlo ka adlaw na ang nakaligad sang ginhaboy ang fetus sa lugar.

Gilayon naman nga ginlubong sa Banica Public Cemetery ang nasambit nga fetus.