Patay ang isa ka pari matapos nahulugan sang daku nga kahoy nga krus nga nahulog sa pader samtang nagamisa sa Guayaquil, Ecuador.
Ginkilala sang Archdiocese of Guayaquil ang pari nga si Padre Patricio Alfredo Sánchez Molinari, nga nagaalagad sa Church of Perpetual Relief of the Central Vicariate.
Makita sa video ang isa ka mabug-at nga krus nga nahulog halin sa likod sang altar kag naigo sa ulo ni Sánchez samtang nagahiwat sang misa.
Gilayon nga nagpangayo sang bulig ang mga tawo nga yara sa simbahan, samtang mabatian naman sa live stream ang singgitan antes gin-utod ang broadcast.
Sa pahayag sang Archdiocese of Guayaquil, nagpabutyag ini sang pagpakig-unong kag simpatiya sa pamilya, mga abyan, kag sa komunidad nga ginserbisyuhan sang pari.
Sa subong, wala pa sang opisyal nga paathag angut sa rason sang pagkahulog sang krus.
