Parking boys ginadumilian na sa parking area sang TATC; pito ka mga traffic auxiliary gindeploy tal-us sa mga parking boys

Ginkumpirma sang traffic supervisor nga si George Aguil nga ginadumilian na sa karon ang mga parking boys sa parking area sang mga salakyan sa Teodoro Arcenas Trade Center (TATC).

Ginpahayag ni Aguil nga nangin epektibo ang pagbawal sa mga parking boys sa nasambit nga merkado publiko sang adlaw nga nagluntad ang pagsumbag sang isa ka parking boy sa isa ka traffic auxiliary sa TATC.

Suno diri madamo na sang reklamo nga nabaton ang tagdumalahan sang Traffic Management Unit (TMU) gikan sa mga drivers sang single nga motorsiklo nga sa pihak nga naka-park na ang ila motor sa parking area, ginahalin ini sang parking boy agud mahatagan sang lugar ang maga-park nga mga 4 wheel vehicles.

Ginklaro ni Aguil nga para sa tanan ang parking area sa diin 1^st come and 1^st serve basis ang ginasunod, basta bakante lamang ang lugar.

Sa pihak nga nagpaathag ang mga parking boys nga wala man sila nagapamilit sukot sa mga drivers nga maghatag sa ila pagpangita sang pwesto para maka-park sang ila salakyan, apang nagpanindugan ang pamunuan sang TMU nga bawalan na ang mga parking boys bilang paghatag aksyon sa pila ka mga reklamo nga ila nabaton.

Samtang kabaylo sang mga parking boys ang full force deployment sang pito ka mga traffic auxiliary nga siguraduhon nga ipatuman ang 1^st come and 1^st serve basis nga pag-park sang anuman nga sahi sang salakyan sa parking area sa merkado publiko.