ROXAS CITY – Ginsabat ni Provincial Agrarian Reform Officer (PARO) Anthony Arostique ang tanan nga mga akusasyon nga ginbuy-an sa kahanginan sang Nemesio Tan Land Holdings Inc., administrator kag barangay kapitan Ferdinand Bacanto angut sa ginaalegar wala nasunod nga proseso sa pag-identify kag validate sa kwalipikado nga farmer- beneficiaries gikan sa Barangay Dulangan, Pilar kag Barangay Culilang, President Roxas nga nakabaton sang Certificate of Land Ownership Award ukon CLOA.
Ginpahayag ni PARO officer Anthony Arostique nga naglawig sang 23 ka tuig antes dalayon nga nahatag ang titulo sa mga farmer-beneficiaries.
Suno sa opisyal nga sa pihak sang mga legal action nga ginhimo sang tagdumalahan sang Nemesio Tan Land Holdings, nakalab-ot ini sa Malakanyang kag gindeny ang petition tobtob nagpapanaug sang order nga padayunon sang ahensiya ang programa kag ipanagtag ang CLOA sa kwalipikado nga benepisyaryo.
Nagapati si Arostique nga posible wala sang nakita nga merito sa nasambit nga petisyon ang presidente rason nga ginmandu sini ang pagpadayon sa programa sang ahensiya.
Ginpasiguro pa sini kun may Temporary Restraining Order (TRO) nga ginpapanaug ang korte sa ahensiya, gilayon nila nga untaton ang programa.
Ginpahayag pa sang opisyal nga tanan nga mga farmer-beneficiary ang syento porsyento nga kwalipikado kag ginpaidalum sa validation ang listahan.
Suno kay Arostique nga naintiendihan sini ang sentimyento sang pihak nga partido, apang nagpanugyan kun may nakita sila nga iregularidad sa ginahimo sang ahensiya indi magpangduha duha nga ipalab-ot ini sa korte.
Samtang matapos ang pag-award sang CLOA sa mga benepisyaryo masunod nga tikang sang ahensiya amo ang installation na sa mga farmer-beneficiaries sa napagkit sa ila titulo.
