Ginsiling sang Commission on Elections (Comelec) nga magalab-ot sa 200 party-list groups ang nag-apply agud magparehistro para sa nagahilapit nga 2025 midterm elections.
Suno kay Comelec Chairman George Erwin Garcia, kung wala sang petisyon nga iplastar agud pamalabagan ang aplikasyon, kwalipikado na ang party-list group nga magpapili sa 2025 elections.
Dugang pa sini nga mga organisado nga grupo lamang nga nakarehistro sa Comelec kag nagpasa sang Manifestation of Intent to Participate ang mahimo nga magpapili sa party-list elections sa masunod nga tuig.
Samtang ginsiling naman sang Comelec kung may mga magapamalabag sa grupo nga luyag magpapili sa 2025 elections, mahimo sila nga magpasaka sang petisyon sa Komisyon sa sulod sang 10 ka adlaw.
Base sa ulihi nga datos may yara na sang 145 nga mga aplikante ang na-aprubahan bilang party-list groups nga magapapili sa Mayo 2025.
